kilimo cha umwagiliaji kitasaidia katika kuinua Uchumi wa Mkulima .

Posted on: May 10th, 2022

Naibu Waziri wa kilimo Anthony Mavunde amefanya ziara katika Halmashauri ya wilaya ya Mpimbwe Mkoa wa Katavi , ambapo ametembelea Skimu ya umwagiliaji katika kijiji cha kilida kata ya Mamba  na kugawa matrekta ya Mkono yaani Powertillers kwa wakulima waliokopeshwa  na Kampuni ya ZANA BORA kupitia Benk ya NMB.

 Akisoma Taarifa   Ndugu  George  Magile Mkuu wa Idara ya kilimo amesema Katika kuhakikisha  Wakulima wanapata huduma bora Halmashauri imeweka mkakati wa kuboresha huduma za ugani kwa kuhamasisha wakulima wajiunge katika  vikundi iliwaweze kufikiwa  kwa urahisi na mpaka sasa vikundi 59  vimeanzishwa  katika kata  mbalimbali  za Halmashauri yaWilaya ya  Mpimbwe.

Jumla ya Wakulima 2134 wamepata mafunzo ya uhifadhi  nafaka salama na wa wakulima 1937 wamepata mafunzo ya kilimo bora  cha mbongamboga  na Matunda .

Aidha wakulima wamepata elimu juu  ya matumizi sahihi na salama ya viuatilifu  na matumizi sahihi  ya mbolea na mbegu bora, kuboreshwa  miundombinu ya Kilimo kwa kukarabati  na kujenga  mifereji ya umwagiliaji kwa lengo la kupunguza  upotevu wa maji,  jumla ya Km3.5 za Mifereji zimeboreshwa  kienyeji pia jumla ya km 59 za barabara  zimekarabatiwa ili kurahisisha usafirishaji wa mazao ya wakulima.

Ndg. Magile amesema katika Halmashauri ya Mpimbwe   Maghala ya kuhifadhia mazao 10 yaliyojengwa na Serikali  yanatumika  na Maghala 147 ya watu binafsi yanatumika  kuhifadhia  mazao ya Wakulima.

Aidha Wakulima katika  msimu huu wa kilimo  toka vyama vya msingi AMCOS wameweza kukopeshwa fedha na pembejeo  za kilimo zenye  jumla ya Tsh 2,074,480,000

Jumla ya wakulima 53 wamepata   Trekta za mkono yani powertillers zenye thamani ya TSh. 683,700,000

Kwa upande wake Mbunge wa jimbo la Kavuu Mh. Geofrey Pinda ameishukuru kampuni ya ZANA BORA kwa kushirikana na Benki ya NMB kwa kutoa zana hizo zitakazo saidia wakulima katika kuzalisha  mazao.

Naibu waziri wa kilimo Mh.Anthony Mavunde  amesema “bonde Hili  ni muhimu kwa nchi yetu ya Tanzania  hasa katika uzalishaji wa mazao  mnaoufanya hapa, ndio maana sisi kama Wizara Tunaliangalia bonde hili kwa jicho la tofauti tukiweka nguvu hapa tutaisaidia Tanzania na siyo Mkoa wa  Katavi  peke yake”

Mh .Mavunde amesema katika malengo ambayo Serikali imejiwekea nikuwa na uzalishaji mkubwa wa Mazao hasa ya  nafaka   kufikia ziada ya  kuuza Nje ya nchi,   ili kuweza kufikia malengo hayo tusilime kilimo cha kutengemea mvua peke yake badala yake tujikite katika skimu za umwagiliaji.

Aidha Mh. Mavunde amesisitiza kuendelea kutumia Teknolojia za kisasa ili kuweza kuacha kulima kwa kutumia jembe la mkono na badala yake kutumia Trekta.

 Na Odetha Salum